ना रजवाड़ा में जन्म लियो,
ना ही गढ़ रो राज।
दरबारां री धोख मारां
जद मिळ है दो मण अनाज।।
राज करणिया राज करयो,
म्हे तो चौकीदार।
रण लड़ता रै शीश चढ़ाता,
साथण ही तरवार।।
साथण ही तरवार,
राजा री शान बचावण नै।
बै जनम्या कूबद कमावण नै
म्हे जनम्या रण में खून बहावण नै।।
म्हे जनम्या रण में खून बहावण नै
बै जनम्या राज रो काज चलावण नै।
म्हे जनम्या हुकुम निभावण नै
बै जनम्या हुकुम सुणावण नै।।
बै जनम्या सोना रा थाळ में खावण नै
म्हे जनम्या सुखा टूक चबावण नै।
बै जनम्या फूला री सेज सजावण नै
म्हे जनम्या रातां री नींद जगावण नै।।
बै जनम्या मद रै रास रचावण नै
म्हे जनम्या रजवाड़ी लाज बचावण नै।
बै जनम्या खुद रो नाम कारावण नै
म्हे जनम्या कौम रो मान कमावण नै।।
जन्मभोम रै मान रे खातर
खुद रो खून बहायो है।
बाँ नै अमर राखबा खातर
मन्न थे बिसरायो है।।
मेरो खून रो मोल छिपायो
रजवाड़ा नै अमर बणायो है।
भुल्या सूं भी याद करो ना
फण बांका थान चिणायो है।।
टूटयोड़ो सो मेरो झुपड़ो
थां सूं अर्ज लगाई है।
रजवाड़ा में धोख मराणियो
मैं काईं करी खोटी कमाई है।।
- लक्ष्मण सिंह चौराऊ
कोई टिप्पणी नहीं:
एक टिप्पणी भेजें